Медикаментозниот абортус конечно достапен на скопска Гинекологија

Од граѓанската организација ХЕРА соопштуваат дека по долга борба и активизам, медикаментозната опција за рано прекинување на бременоста веќе е достапна на скопската Клиника за гинекологија и акушерство.

Нивното соопштение го пренесуваме во целост:

На почетокот на годината, ХЕРА и Универзитетската клиника за гинекологија и акушерство започнаа со спроведување на проект за медикаментозен абортус (абортус со лекови) со цел да се подобрат капацитетите на јавното здравство за обезбедување на оваа здравствена услуга. Заради својата едноставност и безбедност по здравјето на жените, медикаментозниот абортус сè почесто го заменува хируршкиот метод за прекин на бременоста, што се потврдува и со фактот дека со лекови се изведуваат дури 80% од абортусите во земјите во ЕУ. Исто така, во услови на пандемија, абортусот со лекови се смета за побезбедна опција за прекин на бременоста бидејќи ја сведува на минимум потребата од посета на здравствените институции со што се намалува ризикот од изложеност на ковид-19.

Во рамките на проектот, со донација од Меѓународната федерација за планирано родителство, се реновира и опреми просторија на Клиниката која ќе се користи за информирање и советување на жените за медикаментозен абортус. Испечатени се информативни брошури за пациентките и спроведена е обука на медицинскиот кадар кој ќе им ја обезбедува услугата медикаментозен абортус на сите жени кои ќе ја одберат оваа опција. На ваков начин, Клиниката ќе воспостави модел на давање услуги за медикаментозен абортус, кој во иднина би можел да се реплицира и во другите државни болници.

Инаку, соработката помеѓу Клиниката и ХЕРА доаѓа по одлуката на Министерството за здравство да го одобри Клиничкото упатство за безбеден абортус (30 декември 2020 година) кое дава и медицински насоки за изведување на абортусот со лекови согласно стандардите на Светската здравствена организација. Дополнително, во рамките на Превентивната програма за здравјето на мајките и децата за 2021 година, Министерството обезбеди буџет од половина милион денари за набавка на лековите за медикаментозен абортус за Клиниката за гинекологија и акушерство.

Со пилотирањето на оваа услуга на Клиниката за гинекологија и акушерство во Скопје, од денес на жените ќе им биде достапна и алтернативна метода за прекин на бременоста, покрај веќе постојниот хируршки абортус. Сепак, недостигот на лековите на пазарот и недоволно обучениот медицински кадар сè уште претставуваат предизвик медикаментозниот абортус да биде достапен насекаде во нашата земја.

loading...

Останати вести

МОН ќе го унапредува стручното образование преку грантови и проекти

Elena Daskalova

ЕМИ бара навремено отворање на пристапните преговори со Македонија

admin

Инспекторите и МВР со интензивирани активности пред празниците

admin